أنا والاطلال وأثقال الرحيل

آنا والأطلالْ واثقال ِ الرَحـِيلْ (نبطيّة)

تـِسْأليني للوَصِل شنهو السبيلْ
شنهي في حالة َ وضعنا المصلحه

تعرفيني ما أبي غيرچ بديل ْ
هذا ما يحتاج أرجع واشرحه

لو أطير اقصد محياچ ِ الجميل ْ
آنا مثلـِك ْما بُقتْ لي أجنحه

لو نـِوِيت الحربْ واستشهد قتيلْ
ما أشوف الساعْ عندي أسلحه

غير بس أقْدَرْ على قلبي العَلِيلْ
أقطع اعروقه بكفوفي واجْرَحَه

ويمكن اقدر أدخل بقلبـِچ واشيلْ
من حروفه كلمة (الحب) وامسحه

وامشي في وِحْدَه على درب ٍ طـِويلْ
وين ما يُوصل طريقي أفسَحَه

آنا والأطلالْ واثقال ِ الرَحـِيلْ
من يـِجِن ِّ الليلْ كالح أمْدَحَه

ويش اسوي في ظروفي والعويلْ
يحدر الدمعات منـِّي مـِفـْضِحَه

ما أريد إلاانتي في الدنيا خليلْ
إنتي سجدة في صلاتي ومـِسْبَحَه

كـِنْتي في عُوني على الهَمِّ الثقيلْ
كيفْ باتْخـَلّصْ من الهَمْ واشلحه؟

وينَ احَصِّلْ في الخَلـِقْ زيِّـچ مَثيلْ
يدخل بقلبي السَكينه ويبرحه

وانتي معذورة في بُعدِ چ والدَلـِيلْ
كـِلِّ ما يجمع فؤادِ چ أطرحه

آنا فدوة للمدامع من تسيلْ
ليت باب الفرحة بـِيدي وافتحه!

ماهو بـِيدي والتِعَرْفـِينَه قـِليلْ
إعذريني يا حياتي المُفرِِحَه

قـِصِّتـچ تشبه حدود المستحيل ْ
روعـِتِـچ تصهر جليدي وتكسحه

إنتي أجودْ من طـِويلاتَ النخيلْ
وانتي بالميزان ثـِقـْلُ ومَرْجَحَه

بيّضَ الله وجهـچ ِ المـِنْوِِرْ ابليلْ
الله ايْرزقـَه شروقُ ويـِنْجـِحَه